cuestión de ollos!

Chegar tarde a clase, sentar en primeira fila, que o profesor escriba o teu nome na pizarra, escoitar a frase do día: ti non pintas os ollos porque os tes moi grandes!!!

Despois tentar rematar un traballo que vai con moita demora. Explicarlle a un amigo que aos nenos non os traen as cegoñas, en realidade veñen por correo envoltos en papel de regalo. Rir diante dun filme de Pasolini porque Edipo semella ser estúpido.

Antes, enfadar a alguén por non respostar unha mensaxe, e ler un anónimo triste sen saber quen é.

Tamén, facer a matrícula, chamar a casa, doerte das costas, durmir a cachos, escoller a roupa, voltar ao pueblo, decidir como vos organizades para as clases prácticas, felicitar á amiga máis antiga.

Domingo, coller os bártulos e volta á capital-aldea.

Os ovos véndense por ducias.

Regalar un libro un algo macabro que non sabes se gustará. Con dedicatoria estraña.

Tamén estar leda pola carta dunha gaivota migratoria e pola volta de dúas ruliñas do sur.

Triste, quizais, por non ter novas aínda do noso lucense galo.

Non crer aínda que comezase o curso de novo. Ter grandes esperanzas de que este vai ser un moi bo ano.

Laiarte, ás veces, por caprichosa. Outras veces por parva. Buscar un oculista que che cure o cansancio retiniano. Falar en soños. Comer helado de chocolate en boa compaña. Mercar uns pendentes... ou non! Comezar a traballar para a Fanequiña.

Ter ganas de que sexa, todo o curso, como esta primeira semana

...